Eubus ro pasaeamat it Department of Education region VI sa gobyerno probinsyal it Aklan bangud sa madinaeag-on nga hosting it Western Visayas Regional Athletic Association ukon WVRAA Meet 2023 nga nagtapos kahapon nga adlaw it domingo, Abril 30.
Suno kay DepEd region VI spokesperson Mr. Hernani Escullar Jr. nga naging makahawat-hawat ro tanan nga hampang nga ginpasakupan it mga probinsya sa bilog nga Western Visayas nga ginaeakipan it Negros Occidental, Capiz, Antique, Iloilo ag ro host province nga Aklan.
Nakit-an ag nabatyagan sigon ro suporta it Aklan officials bangud nga uwa it na-encounter nga problema sa haeos limang libong delegado nga nagtipon sa probinsya para sa nasambit nga sporting events.
Uwa sigon naging sab-eag ro mga power interruptions sa mga hampang it student-athletes ag may mga nakahaom nga generator sets sa playing venues nga kinahang-ean ro insigidang elektrisidad sa oras it pagkaduea it supply it electric power.
Samtang, eubus man nga ginapasaeamatan it ahensya ro mga personnel it medical emergency response unit nga nakataeana sa tanan nga playing venues bangud sa kaabtik it mga raya sa oras nga may nagaeain ro pagginhawa it atleta bangud sa tuman nga kainit.
Dugang pa ni Escullar nga naging preparado ro Aklan sa ginpatigayon nga mabahoe nga sporting events.
