Sangka nagaka-agnas nga bangkay ro nakit-an sa kama it sangka hotel sa Lhasa, Tibet.
Raya hay matapos mataeupangdan it guest nga may mabaho nga hugum halin kara.
Nag-check in ko Abril 21 sa Guzang Shuhua Inn ro hotel guest nga si Mr. Zhang ag insigida nana nga nataeupangdan nga may kakaibang hugum sa anang hotel room.
Owa anay nana raya gin intindi bangud sa pageaum nga ro hugum hay halin sa restaurant sa ubos.
Gindudahan man nana nga naghalin sa anang siki ro mabaho nga hugum.
Mag-eowas kara, sobra imaw nga gaoy ag gina duyog rason nga nagkatueog anay imaw it pilang oras.
Pagka-bugtaw it 3:30 it hapon, nagguwa imaw it hotel agud nga magpamasyar ag mag-sightseeing.
Pagbalik nana sa hotel, mas pa nga nagbaskog ro mabahong hugum rason nga naghinyu imaw nga isaylo sa ibang room.
Insigida man nga ginpasugtan ro anang request ag ginsaylo imaw sa ibang room.
Pagkagabi-i, ginbugtaw si Mr. Zhang it sambilog sa mga hotel staff ag ginpangutana kon puwede imaw nga maka istorya it mga pulis.
Kat gin atubang nana ro mga raya, nasayuran nana nga may nakit-an nga bangkay sa idaeum it gintueugan nana nga kama ag kinahangean nga boe-an imaw it DNA sample para sa pagahimuon nanda nga imbestigasyon.
Naging viral ag gin istoryahan it mga Chinese netizens ro nasambit nga istorya matapos iplastar ni Mr. Zhang sa anang social media account ro anang kakaibang experiensiya.
Suno kana nga owa eon kunta imaw nga i-istorya raya sa iba bangud nga pilang gabi-i imaw nga indi makatueog sa kahadlok sa kada maisip nga nagkatueog oimaw sa sangka kama nga may kaibahan nga bangkay.
Apang ginpakamayad nana nga ipahayag sa publiko ro angot kara bangud nga ginpamalibaran it Guzang Shuhua Inn ro nasambit nga hitabu.
Sa makaron, nadakpan eon ro suspek nga pumatay ag nagbutang it bangkay sa idaeum it kama apang owa eon raya nagtau it iba pang detalye sa mga awtoridad angot sa nasambit nga kaso.
