Suportado ni Sangguniang Bayan Member Agusto Tolentino ro House Bill 6543 nga tuyong magtao it insurance, benefits ag “Tax-Exempted Hazard Pay” sa tanan nga media workers, regular man, kontraktuwal ukon freelancer.
Suno kana nga kinahangean nga masikyar ro kada benepisyo it sangka media personality bangud sa bukon it madali ro andang trabaho.
Bangud kara mas pa nana nga pabakuron ro nasambit nga house bill sa banwa it Kalibo
Sa kamatuoran sigon hay ginabutang it mga mamahayag sa peligro ro kaugalingon nandang kabuhi eabi eon gid sa mga may field assignments ag pagtao it komentaryo sa mga mabahoean nga personalidad nga nagahimu it ilegalidad.
Ginpahayag dugang pa ni Tolentino nga nagakadapat eamang nga iga-cover it mga benepisyo ro kada katapo it media bangud sa indi masayran ro mga insidente nga posibleng mag-eontad samtang sanda hay nagatrabaho eabi eon gid sa field.
Masyado sigon nga peligroso ro trabaho it sangka media kapin sa mga gina-deploy sa calamity affected areas, conflict areas, lugar nga may maeapnagon nga masakit ag iba pang peligrosong lugar.
Samtang, pila man sa ginabaeawan sa hagna ro pabalibad ukon kapaseawan it media entities nga magtao it dugang nga Insurance Coverage ag hazard pay ukon pagbalibad it insurance companies nga i-enroll ro mga mamahayag ag empleyado it mass media entities ag freelance journalists
