Nakaangkon it sangkiri nga saeabtanan sa tunga nanday House Justice Committee chair Gerville Luistro ag Ako Bicol party-list Rep. Alfredo Garbin Jr. angot sa SALN ni Vice President Sara Duterte.
Ginpunto ni Garbin, nga sangka abogado, nga ro SALN nga ginatumbok nga may unang “material misdeclaration” ukon “untruthful declaration” hay uwa naka-attach sa impeachment complaints.
Ginsabat raya ni Luistro nga bukon pa it raya ro ginatalakay it komite, apang gin-insister ni Garbin nga kat ginpagbotohan ro sufficiency in substance it mga reklamo, nakaibahan ro annexes ukon mga kaeakip nga dokumento.
Ginklaro mat-a ni Luistro nga ro pag-isyu it subpoena hay bukon it para dugangan, suportahan ukon itama kon ano ro nakabutang sa impeachment complaint, kundi para usisaon kon ro reklamo hay bastante para sa existence it probable cause para magiyahan ro panel members sa pagsentensya.
Ginpaathag mat-a ni Rep. Joel Chua nga base sa Section 7 it Rules of Procedure sa Impeachment Proceedings, may gahom ro komite nga mag-isyu it “compulsory processes” para sa pagtambong it mga testigo, ag produksiyon it mga dokumento ag iba pang related evidence, kon sa siin sueod ro pagpa-subpoena sa SALN sa idaeom it gahom it komite.
