Masako eon ro House prosecution panel sa maid-id nga pagpahaum para sa impeachment trial ni Vice President Sara Duterte sa Senado.
Ginhalimbawa ni Batangas Rep. Gerville Luistro ro andang sitwasyon sa medyu uman nga pagbalik sa pagpahaum para sa Bar examinations, bangud nga haeos tanan nga miyembro it panel hay naga-review it rules on evidence ag iba pang legal nga proseso.
Suno kay Luistro, nagpatigayon ro andang grupo ko Miyerkules it “prosecutors learning from prosecutors” session nga ginpangunahan ni Rep. Chel Diokno.
Gintalakay nanda ro mga patakaran sa ebidensya ag mga tikang sa proseso it pagbista.
Kadungan kara hay gina-ayos man it panel ro listahan it mga testigo, mga dokumento, video, ag iba pang ebidensiyang iga-atubang para sa kada artikulo it impeachment.
Ginklaru ni Luistro nga bukon eamang mga papeles ro andang igadihon kundi maging ro nagkaeain-eain nga materyales nga makabulig sa pagpamati.
Madumduman nga gin-aprubahan it Kamara ro impeachment complaint kontra kay Duterte angot sa gina-alegar nga saea nga paggamit it confidential funds, mga isyu sa SALN, gina-alegar nga indi mapaathag nga manggad ag kontrobersyal nga pahayag angot sa pagpamaeag sigon sa Pangueo ag iba pang opisyal.
Ginpamilit man ni Luistro nga ro impeachment hay bukon eamang it simpleng legal nga proseso kundi sangka mekanismo agud nga matumod kon angay ag bagay pa nga magpabilin sa puwesto ro sangka mataas nga opisyal it gobyerno.
