KALIBO, Aklan—Natigayon eon nga maturn-over it National Housing Authority ag lokal nga gobyerno it Kalibo ro 24 sa kabilugan nga 400 nga mga housing units para sa mga nabiktima it bagyong Yolanda sa banwa it Kalibo.
Suno kay Engr. Marlo Villanueva it municipal and development planning office it LGU Kalibo nga ro mga benepisyaryo nga nataw-an eon it housing units sa Barangay Briones, Kalibo hay ro nga nakakompleto it mga ginapangayo nga requirements kapareho it koneksyon it tubi ag kuryente.
Antes nga makahubo hay kinahangean nga i-demolish man nanda ro andang dating baeay.
Kadungan kara, nagpaandam si Villanueva nga kon magpadaean-daean ro iba pang mga beneficiaries it Yolanda housing project hay posibleng bawion kanda ro baeay ag itau sa iba pang mga nagakinahangean nga kwalipikado man.
Matapos nga ma-okupahan ro andang units hay igasunod kara ro pagtau kanda it titulo.
Ginpahayag dugang nga mag-eowas sa Brgy. Briones hay plano man it NHA ag LGU Kalibo nga magtukod it sambilog pang housing project sa Brgy. Nalook, Kalibo.
Samtang, ginaeauman nga sa masunod nga buean hay dugang nga beneficiaries ro mataw-an it housing units.
Apang owa nagtau it ensaktong petsa si Engr. Villanueva kon hin-uno makompleto ro pagtau sa 400 nga mga beneficiaries it nasambit nga pabaeay.
