KALIBO, Aklan—Mas pang ginpabaskog it Highway Patrol Group ukon HPG ro pagpatuman it Republic Act No. 10054 ukon mas kilaea sa Motorcycle Helmet Act of 2009 nga nagataeana sa paggamit it ensaktong helmet sa pagmotorsiklo.
Suno kay P/Senior Master Sgt. Edmund Apelado, OIC it HPG-Aklan nga tuyo kara nga mapabaskog ro seguridad it publiko eabi eon ro mga driver it motorsiklo ag ro mga angkas kara.
Ginpaathag it opisyal nga ro ensaktong helmet hay kinahangean nga aprubado ag nag-agi sa inspeksiyon it Department of Trade and Industry ukon DTI kaibahan ro Philippine Standard Mark ukon Import Commodity Clearance (ICC).
Ro pagbaligya it motorsiklo hay may nagakaigo man nga patakaran, kun sa siin, gina-obliga sanda nga mag-isyu it may dekalidad nga helmet sa mga bumaeakae.
Ro sin-o man nga maga-eabag sa nasambit nga patakaran hay pagamultahan it indi maga-naba sa P10,000 ag indi magataas sa P20,000 sandig sa Sec. 5 it RA 10054.
Samtang, gindugang pa ni Apelado nga ro mga naga-eabag ukon owa nagasuksok it ensaktong helmet nga mga motorista hay pagamultahan it P1,500 sa unang pag-eabag, P3,000 sa ikaywang pag-eabag, P5,000 para sa ikatlong pag-eabag ag P10,000 ag pagkumpiska it lisensiya sa mga masunod pang pag-eabag.
Raya man hay igapatuman sa mga angkas it motorsiklo nga may helmet nga owa it PS Mark ukon ICC sticker.
