Kalibo Aklan ——Nakaalalay makaron ro Highway Patrol Group (HPG) sa mga kapulisan nga nagapatigayon it border chcekpoint sa kada border area it bilog nga probinsya it Aklan halin kat ginpaidaeom sa Enhanced Community Quarantine ro Aklan tuga it 2019 coronavirus disease (COVID-19).
Suno kay PSMSgt. Edmund Apelado it HPG-Aklan, naga-asister sanda sa miyembro it Aklan Police Provincial Office (APPO) sa pag-usisa sa mga motorista nga naga-agi sa border chcekpoint.
Engkaso suno kana nga ro sangka indibidwal hay nakitaan it pag-eabag sa ginapatuman nga Executrive Order nga ginpaguwa ni Aklan Governor Florencio Miraflores hay gilayon raya nga iga-refer sa natungdan nga Municipal Station agud nga mataw-an it nagakaigo nga aksyon.
Ginasigurado sigon nanda nga ro makaeosot sa border checkpoint hay ro may mga quarantine pass nga daea ag may kinahang-ean nga bak-eon kaparehas it pagkaon ag bueong.
Maskin ro delivery truck suno kana hay maid-id nanda nga ginausisa ro mga dokumento nga daea bangud nga delivery eamang it essential goods ro andang ginapasugtan nga makasueod sa probinsya it Aklan.
Samtang sa pihak nga parte, ginlaygayan ni Apelado ro tanan nga magpabilin eon lang sa sueod it panimaeay kon uwa it importante nga panaw sa guwa agud nga makalikaw sa makamaeatay nga virus partikular ro may mga edad nga sanda ro vulnerable sa nasambitang sakit.
Nasayuran nga ro Aklan hay nakalista eon it tatlong kumpirmadong kaso it COVID-19.
