KALIBO, Aklan—Nagapadayun ro operasyon it Highway Patrol Group ukon HPG-Aklan sa hugot nga pagpatuman it Republic Act 4136 ukon Land Transportation Office (LTO) code of the Philippines.
Suno kay PSSgt. Helter Villanueva it Highway Patrol Group it Aklan Police Provincial Office nga makarun nga una eun sa idaeum it Alert Level 1 ro probinsya hay ginaeauman man nanda ro pagtaas it kaso it mga insidente it carnapping.
Bangud kara hay mas maging maid-id sigon sanda sa pagbantay.
Sa kamatuoran sigon kara hay maabo eun sanda nga nadakpan nga mga driver nga naga-eabag sa pagsinueondan partikular ro owa pagsuksok it seat belt ag overcharging fare.
Nagpadumdom man raya sa mga motorista nga magparking eamang sa tama nga lugar ag magsuksok it standard nga helmet.
Kung magbiyahe hay indi man sigon pagkalipatan ro driver’s license agud nga makalikaw sa penalidad.
