Kalibo Aklan ——Kwestyonable para sa sangka opisyal it Brgy. Poblacion, Kalibo ro uman nga pagbalik it mas strikto ag hugot nga border checkpoint pasueod it Kalibo.
Raya hay matapos nga naghaba ro traffic sa Kalibo-Numancia bridge it mga saeakyan nga nagapasueod sa banwa it Kalibo.
Suno kay Barangay Kagawad Mark Sy, ro kaeabanan nga reklamo it mga pumueoyo hay ro ginausuyan sigon sanda it acceptance letter maghalin sa Alkalde it banwa ag sa Barangay mismo nga ginaadtunan.
Sandig sa Executive Order number 23 series of 2020 nga ginpaguwa ni Aklan Governor Florencio Miraflores, ginpaathag ni Barangay Kagawad Sy nga pwede eon makasueod sa banwa it Kalibo ro maskin sin-o provided nga may quarantine pass nga daea ag una sa edad nga 21 hasta 59 anyos ag may importante nga panaw kaparehas it may trabaho, may transaction sa bangko ag iba pang ahensya it gobyerno.
Ginpahayag dugang nga may paghaeoga eon sigon sa border checkpoint apang nakit-an ro bulto it saeakyan ag mga tawo nga nagasueod sa banwa rason nga mas pang ginhugtan ro border checkpoint.
Dapat suno kana iregulate ro mga nagasueod sa banwa ag raya sigon ro anang ginduso sa konseho antes pa man ginbutang ro bilog nga probinsya it Aklan sa General Community Quarantine.
Apang, gusto sigon kara masayuran kon anu ro guidelines nga ginasundan it mga otoridad sa uman nga paghugot sa checkpoint sa mga border control pasueod sa banwa.
Samtang sa pihak nga parte, ginkumpirma ni Kagawad Sy nga uwa it kamatuoran ro nagguwa nga balita nga may nagpositibo sa COVID-19 sa banwa it Kalibo.
Raya hay matapos nga nagkabaeaka ro haeos tanan nga pumueoyo sa banwa bangud sa nagcirculate nga balita sa social media.
Suno kana, indi dapat magpinati-pati ro mga tawo sa nagakalhit nga balita mas kapin pa kon uwa raya naghalin sa Provincial Health Office (PHO) ag iba pang masaligan nga sources.
