KALIBO, Aklan—Kapin sa 40 tons nga pork ag meat products ro nakumpiska ag naaprehend it bureau of quarantine sa nagapadayon nga checkpoint sa mga gintaeanang boarder area kaangot gihapon sa mas ginpabaskog nga pagbantay kontra sa African Swine Fever (ASF) virus nga nagkalhit sa rehiyon it Luzon.
Mag-eowas kara, masobra man sa 1,288 live swine animals ro naipabalik sa point of origin agud nga masigurong uwa it mga buhi nga sapat nga makasueod sa probinsya it Aklan halin sa mga kaprobinsyahanan ag syudad sa Luzon nga apektado it nasambitang sakit sa sapat.
May kaangtanan kara, ginpahayag ni Dr. Joseph Lachica, Veterinarian II it Office of Provincial Veterinarian (OPVET)-Aklan nga nataw-an it ligwa ro mga local hog raiser nga mataeopangdan ro andang mga alagang sapat it mga negosyante bangud nga inde eon nanda kinahang-ean nga mag-import sa ibang rehiyon.
Sa pihak suno kana it nagapadayon nga pagbawae sa importation hay nagapabilin nga istable ro supply it karne ag posible nga inde man pagkueangon sa nagahilapit nga selebrasyon it paskwa ag bag-ong dag-on.
