KALIBO, Aklan— Nagapabiling hugot ro seguridad nga ginapatuman it law enforcement agency sa isla it Boracay bilang pagpahaom sa ginaeaumang pagbuhos it mga turista nga magabakasyon sa tyempo it Paskwa, Bag-ong dag-on ag nagahilapit nga 2019 May mid-term elections.
Suno kay PO2 Jane Vega, tagapaghambae it Aklan Police Provincial Office (APPO), sa pihak sigon nga uwa it augmentation force nga ginpadaea agud madugangan ro pwersa it 118 mga pulis nga naka-deploy sa Boracay police sub-station ag sa 500 nga mga miyembro it Metro Boracay Police Task Force (MBTF) hay padayon gihapon ro pagpatrolya ag pagbantay it mga otoridad sa tanan nga mga nagasueod para mabantayan it husto ro bug-os nga isla.
Ginaeauman eon man nanda ro pagtaas it pilang krimen kaparehas eon lang it pagpanakaw ag panalisi sa mga dumueoong bisita nga kaeabanang ginahimo it mga guwa-sueod sa presuhan nga mga kawatan.
Samtang, ginkumpirma ni PO2 vega nga may pilang Boracay police nga dineputize it Land Transportation Office (LTO) agud magbantay sa mga pasaway nga motorista.
