KALIBO, Aklan—Hugot ro pagbantay makaron it kapulisan ag Philippine Coastguard (PCG) sa mga boarder lines sa banwa it Malay.
Suno kay Task Force Deputy Information Manager Madel Joy Tayco, challenge sigon kanda makaron ro pagbantay sa mga boarder lines sa banwa it Malay kon sa siin ro isla it Boracay hay open ro kaeawran sa iba pang mga isla ag kaeapit probinsya.
Strikto sigon nga ginapatuman sa boarder checkpoint ro pagsikyar sa mga delivery van bangud ro gina-allowed eamang makaron hay ro mga nagadeliver it mga pagkaon ag mga nagapangunang kinahang-eanon it tawo.
Uwa suno kana it ginapasugtan nga may makatabok nga mga turista sa isla bangud ro probinsya hay una sa enhanced community quarantine.
Ro lokal nga gobyerno it Malay hay nakalista it 500 nga Person’s Under Monitoring ukon PUM’s bangud nga naghingabot ro mga tawo nga makauli halin kat ginpatuman ro enhanced community quarantine sa Luzon.
Sa nasambitang numero, 31 eon ro nakatapos sa 14 days home quarantine ag 463 eon lang ro nabilin nga andang ginamonitor.
Samtang, may an-om sanda nga ginakabig nga Person’s Under Investigation ukon PUI’s bangud sa pag-angkon it mga raya it mild symptoms apang makataliwan ro daywang adlaw hay nagstable ro andang condition hasta sa makaron apang ginpaidaeom gihapon sanda sa striktong home quarantine agud nga maid-id nga mamonitor.
Sa pihak nga parte bilang nurse, ginlaygayan ni Tayco ro tanan nga pagpabilin eon lang sa sueod it baeay kon uwa it importante nga ginabakae ukon ginaadtunan; permi maghugas it alima gamit ro sabon ag tubi; pabaskugon ro immune system pinaagi sa pagkaon it mga masustansyang pagkaon ag mag-obserba it physical distancing sa kada isaea nga kapin sa sang metro ukon masobra pa agud nga malikawan ro 2019 coronavirus disease ukon COVID-19 pandemic.
