KALIBO, Aklan—Naga-perform it mayad ro Aklan Police Provincial Office ukon APPO sa kampanya kontra sa illegal gambling.
Suno kay PSSgt. Leonelyn Artes, tagapaghambae it APPO nga base sa record umpisa enero hasta abril it makaron nga dag-on, ro andang mas pa nga ginpabaskog nga kampanya kontra sa illegal gambling activities hay nagresulta sa pagka-aresto sa 29 nga indibidwal sa bilog nga probinsiya halin sa ginpatigayon nga 11 nga operasyon nga ginaeakutan it illegal bookies, tong-its, billiards ag iba pa nga hampang may taya nga kwarta.
Tanan sigon ro mga raya hay napasakaan eon it kaso sa Aklan prosecutors office ag natungdan nga mga korte.
Ginaeauman nga madugangan pa ro numero it mga maaresto bangud sa nagapadayun monitoring it kapulisan.
Kadungan sa ginpabaskog nga programa ag kampanya kontra sa anuman nga klase it illegal nga sugae, naga-apela ro APPO sa mga residente sa kabarangayan nga magbulig agud nga matapna iba pang mga illegal activities eabi eon ro illegal drugs.
