KALIBO, Aklan–Padayun ro hugut nga pagbantay sa Kalibo International Airport kasunod it paeag it bag-ong variant it COVID-19 nga Omicron ag ro pagpaidaeum sa National Capital Region ukon NCR sa alert level 3.
Suno kay Engr. Eusebio Monserate. Jr. Manager it Civil Aviation Authority of the Philippines ukon CAAP-Aklan nga ginapatuman nanda ro tanan nga kinahangeanon nga safety measures kontra sa deadly virus kasunod it uman nga pag-abu it numero it mga pasahero sa nasambit nga paeuparan.
Hugut man nga ginabantayan ro mga naga-abot nga pasahero eabi pa ag haeos katunga sa mga raya hay halin sa NCR ag nagabakasyon sa isla it boracay.
Sa makaron ro tatlong airline companies suno kana hay may tig sangka flight kada adlaw sa KIA.
Activated man sigon ro andang communicable disease preparedness procedures.
Gin-abisuhan man sigon nana ro mga airport personnel nga maging alerto sa pag-assists sa mga pasahero ag maging istrikto sa pag-monitor sa mga raya nga posibleng infected it nasambit nga virus.
Kadungan kara, nag apela imaw sa mga pasahero nga suportahan ro andang ginapatuman nga health and safety protocols ag maging madahan sa pagbiyahe.
Sa pihak nga parte, ginpahayag ni Engr. Monserate nga magapadayun ro andang pagbaton it mga flights samtang owa pa it ginpaguwa nga executive order ro provincial inter-agency task force eabi eon ro taeatapan ni Governor Florencio Miraflores.
Pila sa mga kinahangean nga daehon sa pagbiyahe hay ro s-pass, vaccination card ukon certificate, RT PCR test sa mga owa pa nabakunahan ukon naka-1st dose pa eamang.
Mag-eowas kara, pwede eon nga pag-abot eon lang sa paeuparan iga-check ro nasambit nga mga dokumento it validating team it provincial government agud nga ma-isyuhan it QR code.
