KALIBO, Aklan—Nabatyagan eon ro paggutok it mga daeanon ag establisysmento matapos nga ipatuman ro Alert Level 1 ukon new normal sa probinsya it Aklan.
Umpisa ko Marso 1 hay amat-amat eon ro pag-inabu it mga tawo nga nagaguwa sa tagsa ka panimaeay matapos nga haeugaan ro restrictions ag pagduea sa curfew.
Sa pihak kara, padayun man ro panawagan it health authorities sa publiko nga padayun gihapon nga sundon ro minimum health protocols bangud owa pa natapos ro away sa pandemya.
Indi sigon dapat maging kampante ag sa baylo hay gamiton ro gina-angkon nga sangkiri nga kahilwayan para magdahan ag magpangita agud nga uman nga makabangon.
Agud nga raya hay maging posible, hugut nga ginakinahang-ean ro kooperasyon it kada isaea para daeayon nga matapna ro pagkalhit it deadly virus.
