KALIBO, Aklan–Pagaeauman nga mas pang magiging hugut ro seguridad sa Boracay sa pagagapatigayon nga kaugalingon nga bersyon it Ati-Atihan festival sa isla, suno sa Malay Municipal Police Station.
Sa bisperas ng festival makaron nga adlaw it Sabado, ginpahayag ni P/Lt. Col. Don Dicksie de Dios, hepe it Malay PNP nga naka-full alert status eon sanda.
Nagpakalhit eon it mga police personnel kaibahan ro augmentation force halin sa 2nd company it provincial mobile group ag force multiplier sa mga matawong lugar nga pagahiwatan it mga event partikular sa front beach para sa sadsad panaad.
Naka-alerto eon man sigon ro iba pang natungdan nga ahensiya it gobyerno sa pagresponde sa anuman nga matabu nga untoward incidents.
Samtang, bawae sa sadsad ro mga debotelyang ilimnon kamana man ro pagkalhit it basura sa baeas ag anuman nga nakabaehag sa ordinansa it banwa.
Aminado man si de dios nga mataas ro volume makaron it mga turista sa tunga it super peak season sa Boracay.
Apang pagasiguraduhon sigon nanda nga kapareho ko paskwa ag bag-ong dag-on hay makalista sanda it zero incidents.
Sa idaeum it Resolution No. 127 Series of 2015 it banwa it Malay, ginadeklarang ro selebrasyon hay pagahiwaton kada ikaywang domingo it Enero.
Ro Ati-Atihan de Boracay hay gina-umpisahan it fluvial parade it imahe ni Sto. Niño sa baybayon it isla nga pagasundan it misa sa Parish of the Most Holy Rosary sa Balabag Plaza.
Maabu sa mga residente ag turista hay nagadam-os it buling sa bilog nga eawas agud nga mag-matsa katutubong ati samtang ro iba hay nagasuksok it mga makolor nga costume agud nga makapasakop sa mga tribu ag grupong nagasadsad sa tunog it mga tamboe ag iba pang musical instruments sa puting baeas sa kilid it baybay.
