KALIBO, AKLAN — Ginpakita sa Bombo Radyo it mga kapamilya ni Radigondes Burnasal, residente it Brgy. Tigayon, Kalibo, Aklan ro anang birth certificate nga nagapamatuod nga imaw sa makaron ro pinakamagueang nga tawo sa kalibutan sa edad nga 117.
Nasayuran nga ko Abril 15, 2017 hay nagtaliwan eon sa pihak nga kinabuhi ro Italyano nga ginkilaeang pinakamagueang nga tawo sa kalibutan nga si Emma Morano sa edad nga 117.
Sa kamatuoran hay na-interview pa it Bombo Radyo si lola Radigondes ag ginpaambit ro anang sekreto sa pag-angkon it mahaba nga kabuhi.
Puro mga tinuea ag prutas eamang sigon ro anang ginakaon ag maalaga man imaw sa eawas kapin eon sa anang ikaayong eawas.
Sa makaron sigon hay masarangan pa nana magsimbang naga-isaeahanon ag maglimpyo it mga hilamunon sa palibot bilang anang exercise, apang kon amat sigon hay nagasakit eon ro anang hawak.
Mabahoe sigon ro anang pagpasaeamat sa Diyos sa ginta-o nga mahabang kabuhi kamana man sa anang mga onga nga uwa nagakataka sa pagpalangga ag pag-alaga kana.
Si lola Radigondes hay gin-onga ko Mayo 9, 1900 sa Brgy. Janlud, Libacao, Aklan ag nakaangkon it siyam nga ong sa anang asawang si Leodigario Burnasal nga mabuhay eon nga namatay.
