Nag-abot eon ro nakakahong bangkay it overseas worker nga si Jullebee Ranara sa nasyon.
Ginsueang imaw it anang mga igbata sa NAIA.
Raya ro pinakamasubo nga hitabu.
Naghalin imaw ko 2018 nga mabaskog ag masyadong puno it pageaum ag sa anang pag-uli it uman, imaw hay sangka maeamig eon nga bangkay.
Nakit-an ro sunog nga bangkay ni Ranara sa sangka disyerto sa Al Salmi, Al-Jahra ko Sabado.
Basag ro anang bungo.
Ro suspect hay ro 17-anyos nga unga nga eaeaki it employer nga nag aku eon sa pagpatay.
Nakakulong eon sigon ro suspect.
Si Ranara ro ika-197 nga Pinay worker nga pinatay sa Kuwait umpisa ko 2016.
Kaabuan kanda, pinatay it amo ag ro makasueubo, kaabuan hay pinatay matapos himuslan.
Suno sa Department of Migrant Workers (DMW), haum eon ro bulig it gobyerno sa pamilya ni Ranara.
Ko 2018 pinatay man ro Pinay domestic worker nga si Joanna Demafelis it anang mga among Lebanese.
Matapos nga patyon, ginsueod ro anang eawas sa freezer.
Ko 2019, nagpromisa ro Kuwait government nga pagaprotektahan ro Pinoy contract workers.
Nagpirma sanda sa sangka kasugtanan.
Ginbo-oe ro deployment ban sa nasambit nga nasyon.
Klaru nga owa nasunod ro memorandum of understanding it Pilipinas ag Kuwait nga nagatuyo nga maprotektahan ro mga Pilipino workers idtu.
Owa it naging pueos ro pagpirma it Kuwait bangud nga may una eon man nga pinatay.
Hustisya ro ginasinggitan sa pagpatay kay Ranara.
Obrahon it gobyerno ro tanan nga pamaagi agud nga mapinahan it kamatayon ro killer it makaeoeo-oy nga Pinay worker.
