KALIBO, Aklan—Sa paghatud sa 89 anyos nga peryodista nga si Juan “Johnny” Dayang sa anang ulihing paeahuwayan makaron nga adlaw it Miyerkules, Mayo 7 sa Manila Memorial Park, uman nga nagpanawagan ro anang pamilya para sa hustisya.
Naga-apela ro pamilya Dayang eabi eon ro anang mga unga sa kaparehong mga Akeanon, katapo it media, ag mga awtoridad nga mabuligan sanda nga mataw-an it hustisya ro pagkamatay it andang ama.
Nagapanawagan sanda sa sin-o man nga may nasayuran angot sa pagpatay kay Dayang nga makipagbueuligan.
Pinaagi sigon sa pagpaguwa it kamatuoran hay maangkon ro hustisya sa gindangatan it veteran journalist nga ginbaril it makapilang beses it owa pa nakilaea nga suspek samtang nagatan-aw it telebisyon sa sueod it anang baeay sa Villa Salvacion, Brgy. Andagao, Kalibo pasado alas-8 it gabi-i it Martes, Abril 29, 2025.
Indi sigon sanda magapundo hasta nga indi magguwa ro kamatuoran ag mapasabat ro mga responsable sa krimen.
Ginpahayag it anang pamilya nga si Dayang hay bukon eamang it sangka peryodista, kundi nga sangka ama, manugturo ag matuod nga Akeanon nga naghaead it anang kabuhi para sa kamatuoran ag serbisyo sa banwa.
Eubus sigon sanda nga nagapasaeamat sa tanan nga mga mag-unong sa andang kasubo ag kalisod, apang bukon pa it tapos ro andang pagpangasubo bangud nga owa pa naitau ro hustisya.
