KALIBO, Aklan — Matapos ro haeos 49 anyos hay naangkon eon ro hustisya it pamilya it pinatay nga mangunguma nga si Metodio Inisa sa Sitio Agbanuod, Barangay Panipiason, Madalag, Aklan.
Raya hay matapos nga mapatay sa engkuwentro ko tropa it militar sa Brgy. Cabatangan, Lambunao, Iloilo ko nagtaliwan nga Agosto 15 si Maria Concepcion Bacala, nga nagagamit man it mga alyas nga “Ka Concha ag Inday”, NDF Consultant ag Deputy Secretary it Kilusang Rehiyon-Panay it CPP-NPA.
Kaibahan kara nga napatay ro daywang iba pang lider it Communist Party of the Philippines-New People’s Army (CPP-NPA) sa Panay Island.
Sa ginpatigayon nga press conference it Aklan Police Provincial Office, ginpahayag ni Nemia Inisa-Mirano, igmanghud it biktima nga owa sigon nanda ginaeauman nga mataw-an pa it katumanan ro andang ginahandum nga hustisya.// apang kat mabalitaan ro pagkapatay kay Ka Concha hay matsa nabunutan it tunok ro andang dughan .
Madumduman nga ko 2022 hay ginsentensiyahan it hasta nagakabuhi nga pagkapresu si Ka Concha it korte sa Taguig City matapos nga napamatud-an nga guilty sa pagpatay kay Inisa ko gabi-i it September 18, 1975.
Gindugang pa ni Nemia nga indi nanda malipatan ro natabu bangud sa atubang nanda hay ginpatay ro anang magueang matapos nga ginpasugtan nana ro sangka miyembro it Philippine Constabulary nga temporaryo nga magpahuway sa andang baeay.
Dating napresu si Ka Concha ko 1985 apang napahilway sa Camp Delgado sa Iloilo City matapos nga kabigon nga political prisoner ag nagpaidaeum sa house arrest apang naka eskapo.
Uman nga nadakpan ko Agosto 2015 apang temporaryo nga nakahilway ko 2016 agud nga magpasakop sa peace talks sa Norway.
Ro patong sa anang ueo nga P5.3 milyon hay igatau sa mga indibidwal nga nakasugid sa anang ginakahimtangan.
Nagapati man ro mga awtoridad nga ro pagkapatay kay Araneta ag sa daywang iba pang lider nga anang kaibahan hay magiging senyales it pagwakas it insureksyon sa isla it Panay.
