KALIBO, Aklan—Hustisya ro panawagan it pamilya it dating sangguniang bayan it Malinao nga napatay matapos nga ginbaril it makapilang beses samtang nga nagapa-uli sakay it anang motorsiklo pasado alas-9:40 it gabi-i it Sabado sa Sitio Baid, Brgy. San Roque, Malinao, Aklan.
Sa imbestigasyon it pulisya, halin ro biktimang si John Rondario, 50-anyos, residente it nasambit nga lugar sa anang mga amigo sa pihak nga barangay ag ginbantayan sa anang pag-uli.
Nakapadaeagan pa sigon raya it anang motorsiklo it pilang metro apang eubusan nga natumba.
Insigida raya nga namatay bangud sa naangkon nga mga tama it bala sa nagkaeain-eain nga parte it eawas.
Sa interview it Bombo Radyo, ginpahayag ni Mrs. Corazon Rondario, ina it biktima nga masyadong nagkumpiyansa ro anang unga bangud nga puro amigo ro anang kaibahan sa inuman.
Sa pihak nga parte, gin-insister pa ni Mrs. Rondario, nga owa sanda it nasayuran nga kaaway ukon paeag sa kabuhi it anang unga bangud nga mabuot ag mabinuligon raya nga klase it tawo.
Eubus sigon imaw nga nagakanugon sa pagpatay sa anang unga bangud nga mag-eowas nga may ginapatuon pa nga 4 nga mga unga hay kinahangean pa ro anang serbisyo it anang mga kasimanwa.
Nasayuran nga ro biktima hay presenteng nagatrabaho bilang security aide it Office of the Vice Mayor.
Nakaserbisyo man imaw bilang barangay kapitan it san roque sa sueod it tatlong termino.
