KALIBO, Aklan—Aminado ro Municipal Inter-Agency Task Force it LGU-Banga nga may kakueangan sa pag-asikaso sa tatlong residente nanda nga nagpositibo sa covid-19 nga nagpaeagiw halin sa andang quarantine facility.
Suno kay Donnalyn Siyambio, tagapaghambae it IATF-Banga nga bangud nga punuan eon ro andang quarantine facility rason nga ginbutang ro tatlo sa barangay isolation unit kun sa siin hay kueang sa pasilidad.
Nagdesisyon sigon ro tatlo nga ginaeakipan it sangka eaeaki ag daywang babaye nga puro miyembro it sangka pamilya nga mag uli sa andang baeay bangud nga bukon sanda it komportabli.
Nagdesisyon ro LGU-Banga nga usuyan sanda it mabutangan nga lugar hasta nga eubusan nga magmayad halin sa sakit.
Gindugang pa ni Siyambio nga nagakabagay kunta ro andang baeay it mga pasyente nga obrahon nga quarantine area bangud nga ro andang masters bedroom hay may kaugalingon nga banyo apang nauna eon sanda nga ginpaandaman it provincial IATF nga bawae ro home quarantine para sa mga covid positive.
