KALIBO, Aklan—Ginakonsidera makaron ni Ibajay mayor ag League of the Municipalities of the Philippines ukon LMP-Aklan chapter president Jo-en Miraflores ro pagkansela it Christmas parties sa andang mga opisina ag departamento.
Suno kana nga bukon it prayoridad ro pagpatigayon it Christmas parties eabi ag owa pa natapos ro pandemic nga daea it coronavirus disease ukon covid 19.
Sa baylo nga mag-Christmas parties, gin engganyo ni joen ro mga empleyado it LGU-Ibajay nga i-selebrar ro kapaskwahan sa andang baeay kaibahan ro andang mga mahae sa kabuhi.
Gindugang pa kara nga maskin nga sa idaeum eon it Modified General Community Quarantine ukon MGCQ ro Aklan, kun sa siin, medyu haeuga eon ro mga quarantine measures, nagapabilin nga limitado sigon ro mass gatherings.
Apang gin-insister kara nga magahueat sanda it ‘go signal’ halin sa National Inter-Agency Task Force.
Samtang, agud nga mabatyagan gihapon it mga taga-banwa it Ibajay ro espiritu it paskwa, magapatindog sigon sanda it mga Christmas trees nga nakasanayan nga obrahon it LGU kada dag-on.
