KALIBO, Aklan—Pabor si Ibajay Mayor ag League of the Municipalities of the Philippines ukon LMP-Aklan chapter president Jo-en Miraflores sa desisyun it National Inter-Agency Task Force nga ginapasugtan eon nga magguwa ro mga naga edad it 15 hasta 65 anyos.
Apang kinahangean sa gihapon suno kana nga hugut nga ipatuman ro minimum health standard bilang pagpangaman sa Coronavirus Disease ukon COVID-19.
Madumduman nga ginhugtan it IATF ro edad it mga puwedeng magguwa kat magpatuman it community quarantine bangud sa COVID-19 kun sa siin owa dati ginapasugtan ro edad 21 panaba ag 60 anyos pataas mag-eowas eamang kon naga-agto sa trabaho ukon magabakae it mga nagapangunang kinahangeanon.
Samtang, gin engganyo dugang ni Mayor Miraflores ro publiko nga mag-agto eon sa mga sementeryo agud nga magbisita sa mga mahae sa kabuhi nga nagtaliwan eon bangud umpisa sa Oktubre 29 hasta Nobyembre 4 hay sarado ro mga sementeryo sa probinsiya it Aklan.
