KALIBO, AKLAN — Naka-alerto sa gihapon ro mga otoridad sa Boracay samtang una pa sa isla ro iba sa kapin sa 200 youth ambassadors sa ginpatigayong 29th Ship for Southeast Asian and Japanese Youth Programme (SSEAYP) International General Assembly 2017 nga nagtapos ko Abril 30.
Ro mga delegado para sa limang adlaw nga event hay naghalin sa Brunei, Cambodia, Indonesia, Japan, Laos, Malaysia, Myanmar, Singapore, Thailand, Vietnam ag ro host nga Pilipinas.
Matapos ro ginpatigayong Council of Presidents (COP) meeting, welcome dinner ag opening ceremonies ag trade fair sa Iloilo Convention Center hay nagdiretso ro mga delegado sa Boracay para sa closing ceremonies ag iba pang beach activities.
Ro tema makarong dag-on hay “One Heart, One Beat, One Team” nga may katuyuan nga mas kapin pang mapabaskog ro kaangtanan ag relasyon it mga pamatan-on it Southeast Asian Region ag Japan.
Samtang, ginpahayag ni acting police provincial director S/Supt. Lope Manlapaz, hugot nga seguridad ro andang ginapatuman para sa nasambitang event.
Nakaangkon sigon it route security sa mga lugar nga gin-agyan it mga delegado halin sa Iloilo paadto it Boracay.
