Ginbasura it International Criminal Court (ICC) Appeals Chamber ro apela ni dating pangueong Rodrigo Duterte nga ipabasura ro kasong crimes against humanity kontra kana bangud sigon sa kawad-an it hurisdiksyon.
Sa desisyon makaron nga Abril 22, ginpahayag it tribunal nga nagapabilin ro gahom kara sa kaso maskin nga nag-atras ro Pilipinas sa ICC ko 2019.
Bangud kara, ginakabig man nga uwa it pueos ro hinyo it depensa para sa insigidang pagpahilway kay Duterte.
Gin-insister it kampo it dating presidente nga uwa it awtoridad ro ICC bangud sa nag-atras eon ro nasyon antes pa umpisahan ro imbestigasyon.
Apang, ginpalig-on it korte ro naunang desisyon nga sakop gihapon kara ro mga alegasyong krimen bangud sa natabo ro mga raya ko miyembro pa ro Pilipinas it Rome Statute.
Samtang, sangka hukom ro nagpamaeabag sa pilang parte it desisyon.
Nauna eon nga gin-usisa sa pagpamati ko Pebrero ro tatlong numero it crimes against humanity, kaibahan ro 78 kaso it pagpatay ag hana nga pagpatay halin 2011 hasta 2019.
Masunod nga bantayan ro desisyon kon magahueag ro kaso sa eubusang pagbista.
