Ginkumpirma ni Atty. Krissy Conti, assistant to counsel sa International Criminal Court (ICC), nga nabilog eon it Trial Chamber III nga magabuyot sa kaso ni dating Pangueong Rodrigo Duterte angot sa war on drugs.
Suno kay Conti, ro ICC hay nagtaeana it tatlong huwes: Judge Joanna Korner, Judge Keebong Paek, ag Judge Nicolas Guillou, agud pamatian ro nasambit nga kaso.
Dugang pa nana, ro mga masunod nga tikang hay puro administratibo ag nagakinahang-ean it koordinasyon sa tunga it prosecution, defense, ag victims’ legal teams.
Posibleng magpatigayon it status hearing sa private session sa mga maabot nga inadlaw.
Ro ICC hay nag-umpisa it imbestigasyon sa Pilipinas matapos ro mga report it libo-libong pagkamatay sa idaeom it kampanya kontra droga ni Duterte halin 2016 hasta it 2022.
Ko 2021, ginpahanugutan it ICC Pre-Trial Chamber ro full investigation, nga ko ulihi hay temporaryong ginsuspinde apang uman nga ginpadayon ko 2022.
Sa pihak it pag-atras it Pilipinas halin sa Rome Statute ko 2019, gin-insister it ICC nga may hurisdiksiyon raya sa mga krimen nga natabo sigon samtang miyembro pa ro nasyon.
Ro pagbilog it Trial Chamber hay importanteng yugto sa proseso, bangud sa raya ro magabukas it pormal nga pagbista kon sa siin pagatalakayon ro ebidensiya ag testimonya kontra sa dating Presidente.
Sa makaron, ginaeauman ro mas hugot nga koordinasyon it mga partido.
