Nagpaandam ro International Criminal Court (ICC) Trial Chamber III sa mga partidong imbolbado sa kaso ni dating Pangueong Rodrigo Duterte kontra sa pag-tao it mga pahayag sa media angot it mga pagpamati ag desisyon it korte, bangud posible sigon rayang magtuga it pagkalhit it saea nga impormasyon.
Sa pangaywang status conference, ginpunto it hukuman nga ro tamang lugar para talakayon ro mga istorya it kaso hay sa sueod it courtroom ag bukon sa pampublikong diskusyon ukon media, samtang gin-insister nga ro mga pagbista hay uwa ginapatogayon base sa opinyon it publiko.
Ginlaygayan man ro media nga maging tama ag patas sa pag-report, kapin eon sa mga kasong may mabug-at nga pasibangud, ag padumdum nga uwa dapat ginasapubliko ro mga na-istoryahan sa mga pribadong sesyon.
Napuna man it hukuman ro pilang naunang pahayag it dating lead counsel ni Duterte nga si Nicholas Kaufman, nga nag-tao sigon it personal nga opinyon angot sa mga desisyon it korte sa mga panayam, nga ginakabig nga bukon it insakto sa propesyon.
Ginpunto man ro pagkinahangean nga repasuhon ro Defense Code of Conduct agud magbutang it mas klaro nga sueundanan sa pakikipag-angot sa media.
