NATIONAL News — Nagpaguwa eon ro International Criminal Court (ICC) it order sa prosecution team ag defense team ni dating presidente Rodrigo Duterte agud magpresentar it mga ebidensya sa masunod nga buean.
Suno sa ICC, mas mauna raya sa schedule it hearing it mga kaso kay Duterte nga nauna eon nga gintaeana sa Setyembre.
Sa sangka mando nga may petsa nga Marso 21, ro Pre-Trial Chamber hay nagmandu sa prosecution team ag defense team nga ipahayag ro kaabuan ag klase it ebidensya nga plano nanda nga ipresentar, kaibahan ro gintaeana nga timeline.
Ginmanduan man ro prosecution nga magsumite sa Abril 4, 2025 it impormasyon sa kabilugan nga kaabuon it nasueat nga mga ebidensya, pila ro mga testigo ag mga pahayag it testigo ag iba pa.
Nakataeana man nga igapresentar it prosecution ro mga tikang kon paalin nga maprotektahan ro mga posible nga mga testigo sa oras nga magapadayon ro imbestigasyon kay Duterte ag kon paalin raya nga makaapekto sa disclosure process.
Para man sa legal team ni Duterte, may tiempo sanda hasta sa Abril 11, 2025 agud isumite ro andang mga obserbasyon sa impormasyon nga ipasa it prosekusyon. Kinahangean man nanda nga sabton kon magapresentar sanda it ebidensya ag maga-atubang it andang kaugalingon nga mga testigo sa tiempo it confirmation hearing.
Angot man sa partisipasyon it mga biktima, ro ICC hay magatau it Registry hasta sa Abril 2, 2025 sa pag-file it mga obserbasyon may kaangtanan sa mga aplikasyon it mga biktima para sa partisipasyon, eakip eon ro proseso it admission process, pamatuod it mga dokumento it identity, ag legal nga representasyon sa proceedings. Ro magtimbang nga parte hay may tiempo hasta sa Abril 11, 2025 sa pagsabat.
Ginapakita sa mga rekord it pulis nga ro mga napatay sa idaeum it drug war naga-abot sa 6,000, apang ro mga human rights group hay naga-insister nga may 30,000 nga mga biktima, eakip ro mga ginpatay it mga vigilante.
Samtang, pinaagi sa unga nga si Vice President Sara Duterte, ginpahayag it anang ama nga owa imaw it kaso nga saebton sa ICC.
