KALIBO, Aklan — Nagapadayon ro monitoring it pulisya sa mga kabanwahanan sa probinsya it Aklan nga may mga identified drug personalities.
Suno kay Police Major Bernard Ufano it Provincial Intelligence Service (PIS)-Aklan, kapin sa 6 ka banwa ukon may 40 ka barangay eon lang ro una sa idaeom it andang monitoring ag surveilance.
Pamatuod kara ro positibong operasyon it Provincial Drugs Enforcement Unit (PDEU) nga may mga naaresto gihapon sanda nga nagaduso it illegal nga droga.
Ginpahayag dugang nga inde sigon sanda mag-untat sa andang operasyon hasta nga inde matapna ro transaksyon it droga sa probinsya.
Sa pihak nga parte, inde suno kay Ufano malikawan nga maging “apple of the eye” ro Aklan bangud sa isla it Boracay rason nga ginaeauman eon nanda ro uman nga pagguwa it mga mapamentahang tawo kaparehas it salisi, manakaw ag budol-budol makaron nga yuletide season ag mas kapin eon sa paaeabuton nga Kalibo Sto. Nino Ati-atihan Festival 2020.
May kaangtanan kara, nakaalerto eon sigon ro mga awtoridad ag raya sa makaron ro andang ginatutukan.
Gin-engganyo man kara ro publiko nga mangin mapagmatyag sa palibot ag inde eon maghandom it mas sobra pa sa ginaangkon makaron partikular ro material nga butang ag basi dikara pa mabiktima it budol-budol.//
