KALIBO, Aklan—Igapatigayun makaron nga adlaw it Miyerkules, Marso 10 ro pagbakuna sa probinsya it Aklan matapos nga nag-abot eon ro unang batch nga 2,420 vials it Coronavax nga ginpadaea it Department of Health (DOH) Region 6.
Suno kay Dr. Ma. Maila Bernabe it Aklan Provincial DOH Office nga gintunga-tunga nanda ro mga nasambit nga vials sa tanan nga ospital ag healthcare facilities sa probinsya.
Suno kana, 920 vials ro andang gin-alokar sa Dr. Rafael S. Tumbukon Memorial Hospital (DRSTMH); 20 vials sa St. Gabriel Medical Center ERT; 320 vials sa Panay Health Care; 170 vials sa Aklan Cooperative Mission Hospital; 290 vials sa St. Gabriel Medical Center; 70 vials sa St. Jude Hospital; 50 vials sa Buruanga Municipal Hospital; 90 vials sa Circiaco Tirol Hospital; 60 vials sa Don Leovigildo Diapo Sr. Hospital; 110 vials sa Altavas District Hospital; 200 vials sa Ibajay District Hospital ag tig 60 vials sa Libacao ag Malay Municipal Hospital.
Haum eon man suno kana ro nasambit nga mga medical frontliners nga magbaton it bakuna nga himo it Sinovac Biotech it China.
Ginpasiguro man ni Dr. Bernabe nga ro 2,420 inidbidwal nga pagabakunahan makaron nga adlaw hay magabaton man it ikaywang shot sa buean it Abril ukon makataliwan ro 28 diyas.
