Kalibo Aklan ———–Nagpangayo it bulig si Warlito Mendoza, Jr. igmanghud it biktimang si Welyn Mendoza Tabuna sa pamunuan it PNP nga magpatigayon it madaeum nga imbestigasyon agud nga masolbar ro natabu nga pagmasaker sa anang igmanghud ag daywang mga unga kara nga puro menor de edad .
Suno kana nga owa imaw it natandaan nga naging kaaway it biktima sa andang lugar , mag-eowas sa pagsunggod it live-in partner it andang tiya nga ginpahalin ni Welyn sa trabaho bilang panday sa anang ginapa-construct nga baeay sa nasambit nga lugar may daywang domingo eon ro nagtaliwan .
Ginapatihan nga aga-aga eon kat ginpatigayon ro krimen bangud nga preska pa ro mga dugo nga nakakalhit sa kama.
Pareho sigon sanda nga nagtambong sa birthday party ko gabi-i it martes ag samtang naga-report sa trabaho pagka-aga sa sangka kompaniya bilang security guard hay napan-uhan nanda it andang kamanghuran nga manghud nga may mancha it dugo ro door knob it baeay ni Welyn.
Pagbukas sigon nanda it pwertahan hay dikara nakita nanda ro duguan nga eawas it mag-ina.
Nataeupangdan sigon nanda nga may mga nina pa ro mga alima it biktima nga senyales nga nagsukoe pa si Welyn.
Narekober sa crime scene ro kutsara nga ginapatihan nga gingamit sa pagbringka it pwertahan .
Ginkumpirma kara nga sambilog sa andang ginadudahan nga naghimo it krimen hay si Patrick Cahilig nga sa kustodiya makaron it pulisya.
Ginaturo nga kakunchaba kara ro anang live-in partner nga si Floramie Seraspi nga andang tiya nga indi eon makita makaron ro anang presensiya.
Sa makaron hay nagapadayun pa suno kana ro imbestigasyon it pulisya sa insidente.
