KALIBO, Aklan—Uman nga gindumdum it mga tumandok ro ika-108 nga birth anniversary ni Godofredo Peralta Ramos, ginakabig nga “Ama it Akean” nga naging kabangdanan it pagseparar it Aklan halin sa Capiz.
Ginpangunahan it anang pamilya ag pilang mga opisyal it probinsiya ro wreath-laying ukon paghaead it bueak sa anang monumento sa prente it capitol building.
Kaibahan sa nagtambong sa simpleng seremonya si dating Vice Governor Atty. Ronquillo “Kel” Tolentino.
Suno kana nga angay ag bagay nga dumdumon ag pasidunggan si Ramos bangud sa anang mga naging achievements sa pulitika ag kamaeayran nga ginhimo para sa probinsiya it Aklan.
Dapat man sigon nga himuon nga ehemplo it mga pamatan-on si Ramos bangud sa anang mayad nga pagkatawo ag mga sakripisyo nga ginhimo para sa kamaeayran it tanan.
Nasayuran nga si Ramos hay naging congressman, kon sa siin, anang ginsueat ro bill ukon hagna nga ko ulihi hay ginpirmahan ni dating Pangueong Ramon Magsaysay nga maging laye pinaagi sa Republic Act 1414 ko Abril 25, 1956.
Ginkilaea it laye ro Aklan bilang sangka probinsiya.
Nagserbisyo man imaw bilang Justice it Court of Appeals, gobernador it Aklan ag delegado sa Constitutional Convention.
Gindeklarang special non-working day kada Nov. 8 sa bilog nga Aklan ag isla it Boracay sa gahum it Proclamation No. 194.
Si Ramos hay natawo ko Nov. 8, 1911 ag nag retiro halin sa government service ko Nov. 8, 1976.
Namatay imaw ko Hulyo 17, 1977.
