KALIBO, Aklan–Ginpakigbahin it sangka batikan ag kilaea nga abogado sa probinsya it Aklan ro anang personal nga eksperyensya sa ginpatigayun nga EDSA People Power Revolution, may 37-anyos eon ro nagtaliwan.
Suno kay Atty. Harry Sucgang nga sambilog imaw sa nakibuylog sa milyon-milyong katawo nga nagtililipon sa EDSA para ipanawagan ro pagpanaog sa pwesto ni dating Presidente Ferdinand Marcos Sr.
Raya hay kasunod it natabo nga grabeng dayaan sa eleksyon nga ginkaakig it mga pumueoyo.
Madumduman nga gindeklara it Commission on Elections (Comelec) nga nagdaog si Marcos Sr. samtang base man sa deklarasyon it National Citizen’s Movement for Free Elections (NAMFREL) hay daog si dating Pangueong Corazon Aquino.
Dikara eon sigon nag-umpisa nga magkagulo ro mga tawo hasta nga magdesidir sanda nga magtililipon sa EDSA matapos ro naging panawagan ni Jaime Cardinal Sin pinaagi sa Radyo Veretas.
Sa rato nga tyempo, may pilang militar eon man nga bumaliskad kay Marcos ag nakibuylog sa pagpatigayun it rebolusyon.
Ro rebolusyon hay resulta it mabuhay eon nga pagpamigos sa kahilwayan ag pagbayolar sa tawhanong kinamatarong sa pag-umpisa it Martial Law ku 1972.
Sa raya nga mga dinag-on maabo ro mga insidente it asasinasyon partikular sa mga nagakontra sa gobyerno.
Raya nga parte it istorya it Pilipinas hay nagtao katun it dungog, eabi pa ro ibang nasyon hay naghana man nga matupungan ro atong pagpakita it minatuod nga gahum it demokrasya.
