KALIBO, Aklan–Naging makolor ro selebrasyon it ika-66 nga anibersaryo it Aklan Day, makaron nga adlaw Abril 25, 2022.
Ro okasyon hay ginpangunahan ni Aklan Governor Florencio Miraflores kaibahan ro pilang personalidad ag representante it nagkaeain-eain nga departamento it probinsya.
Sa anang diskurso, ginpasaeamat ni Governor Miraflores ro mga tawo nga una sa likod it pagiging independent it Aklan eabi eon ro pagtinguha ni dating Congressman Godofredo Ramos para maseparar ro probinsya sa Capiz.
Ginkalipay man it gobernador nga nakaibahan imaw sa development it probinsya sa nagtaliwan nga pilang dag-on kung siin maabu nga mga awards ag accomplishment ro atun nga naangkon.
Kaibahan eon kara ro gintao nga pagkilaea it Department of the Interior and Local Government (DILG) sa sueod it limang dag-on nga Seal of Local Good Governance sa Aklan kung siin naga-isaeahanon eamang raya nga probinsya sa bilog nga Western Visayas nga nakabaton it kaparehong pagpasidungog.
Nagaeaum si Miraflores nga mapabilin it mga Aklanon ro manami nga record it probinsya ag mas pang makatao it maabu nga oportunidad sa mga pumueoyo.
Bilang pagdumdom sa anibersaryo it probinsya, dag-unan man nga ginahiwat ro week long activity kaparehas it pagdisplay it mga produkto it kada banwa ag pagkinasadya.
