Kalibo Aklan ————Uman nga ginbalikan ag ginpaathag it sangka batikan nga abogado ag dating public official sa probinsiya it Aklan ro naging eksperyensiya it mga Pilipino ko tiyempo it pagdomaea ni President Ferdinand Edralin Marcos sa idaeum it Martial Law.
Insakto makarun nga adlaw ro ika-49 anyos nga anibersaryo it martial law sa Pilipinas.
Suno kay Atty. Plaridel Morania nga naging matawhay ag desiplinado ro mga Pilipino ko dati anay nga tiyempo.
Sambilog eun sigon sa importante nga parte it aton nga kasaysayan ro Marial Law kung sa siin kato nga tiempo hay ginasugid nga naduea ro kahilwayan, eapnaag nga pagpatay, pagpang-aresto sa mga nagakontra sa gobyerno ag gulpi nanda nga pagkaduea.
Gindeklara ro Martial Law ko ika-21 it Setyembre 1972 sa gahum it Proclamation Number 1081 nga ginpirmahan ni dating Presidente Marcos.
Suno kay Marcos gindeklara kara ro pagpatuman it Martial Law sa daywang ka rason.
Ro una hay agud maging euwas ro nasyun sa alima it mga kaaway ag ro pagtukod it panibag-ong gobyerno nga magakriar it pag-umwad, seguridad ag kaeuwasan sa mga Pilipinhon.
Ginpaathag kara nga kinahang-ean ro Martial Law agud mataw-an it proteksyon ro demokrasya sa nasyun halin sa mga kaaway kaparehas it CPP-NPA ag PKP-HMB, Moro National Liberation Front nga nagahandum nga magtukod it separado nga estado sa mindanao pina-agi sa armadong paghueag, ro pagpasilabot it mga dumueuong ag maabu pa nga mga grupo.
Nagapati man si Marcos nga kinahang-ean it nasyun ro mabaskog nga pwersa agud insigida nga masabat ro hangkat it mga kaaway ag maprotektahan ro nasyun.
Sa pihak it natabo may mga mapinuslanon man nga mga nahimo ro nasambit nga teimpo kaparehas it pagbaskog it turismo, pagtukod it mga edipisyo nga ginaeakipan it Cultural Center of the Philippines, Folk Arts Theater, San Juanico Bridge, Philcite ag iba pa.
Nakaangkon man it LRT nga hasta sa makaron hay ginapanipuslan it mga pumueuyo.
Maabu ro mga ginbawae kaparehas it pagbatikos sa gobyerno pina-agi sa dyaryo telebisyon ag radyo.
Mag-euwas sa ginapatuman nga Censorship, strikto man ro implementasyon it Curfew.
Ginadakop ro sin-o man nga sa guwa it panimaeay umpisa it tungang gabie hasta it alas 4:00 it aga aga.
Napuno ro mga nagkasari-sari nga mga presuhan eabi eon sa Camp Aguinaldo, Crame ag Fort Bonifacio it mga tawo nga nag-eabag sa mga ginpatuman nga sueondanan.
Kaeakip man kara ro mga karibal sa pulitika ni Marcos nga sanday senador Benigno Aquino Jr., Senador Jovito Salonga ag Senador Jose Diokno.
