KALIBO, Aklan — Nagapangatubang sa reklamong Republic Act 10591 ukon “Comprehensive Firearms and Ammunition Regulation Act” ro sangka indibidwal matapos nga maaresto sa ginpatigayon nga search warrant operation it mga awtoridad sa Barangay Dongon East, Numancia, bandang alas-8:30 agahon it Lunes, Marso 24.
Raya hay matapos nga marekober sa baeay it suspek nga si Omar Bacuta, sa legal nga edad ag residente it nasambit nga barangay ro sangka ilegal nga baril.
Ginserbi it mga katapo it Numancia Municipal Police Station ag Aklan Provincial Intelligence Unit (PIU) ro search warrant kontra kay Bacuta kun sa siin sa paghaeughog sa anang baeay hay narekober ro sangka unit it caliber .38 revolver.
Suno kay P/Capt. Conrado Espino, hepe it Numancia MPS nga ginkasa ro operasyon kasunod it nadiskubrehan nga naeakot raya dati sa sangka kinagamo ko Hunyo 20 it nagtaliwan nga dag-on matapos nga mabaril ro sangka security guard kamana man nga nakulong bangud sa pagduso it illegal nga droga.
Presenteng nakakulong ro suspek sa detention facility it Numancia MPS.
Samtang, padayun ro kampanya it PNP para sa mga loose firearms ag ilegal nga droga.
Nagapanawagan si P/Capt. Espino sa iba pang tag-ana it baril nga owa it nagakaigo nga dokumento nga isurender ro andang mga baril agud nga malikawan nga makaangkon it kaso.
