Health News ——Gina imbestigahan eon it Food and Drug Administration (FDA) ro pagturok it bukon it awtorisadong COVID-19 vaccine sa pilang militar ag gabinete, suno kay Department of Health Undersecretary Eric Domingo.
Suno kay Domingo, owa pa sigon nakatau it report ro regulatory enforcement unit ag ginasugid nga naga-usoy eon ro mga raya it iba pang detalye angot sa natabung vaccination.
Pagatumuron sigon nanda kon siin naghalin ro bakuna.
Ano ro assurance nga matuod ro bakuna ag na-handle baea raya it husto antes nga ginturok sa mga ginasugid nga soldado.
Dugang pa ni Domingo, pagakutan-on sigon kara ro Philippine Army ag Presidential Security Group (PSG) para sa iba pang impormasyon it mga nakabaton it bukon pa it awtorisadong vaccine.
Owa man sigon nasayuran ni Health Secretary Francisco Duque III kun sin-u-sin-o sa gabinete ro naturukan it vaccine ag bukon sigon raya it kaibahan sa mga naturukan.
Ko sabado hay namitlang ni Pangueong Rodrigo Duterte nga pila sa mga military personnel ro nakabaton eon it COVID-19 vaccine halin sa Chinese manufacturer nga Sinpharm nga owa pa it approval it FDA.
Ginpahayag man it Armed Forces of the Philippines, ro mga nakabaton eamang it vaccine hay halin sa PSG.
Ginpahayag pa ni Domingo nga owa pa gina istorya it Sinopharm ro FDA para sa posibleng aplikasyon.
Paga tinguhaan man sigon nga makipag istorya it FDA sa Chinese manufacturer sa bulig it Chinese Embassy.
Ginpaathag ni Domingo nga magiging legal eamang ro paggamit it vaccine kun ro kumpanya hay magapasa it aplikasyon para sa “compassionate special permit” nga ginatau eamang para sa medicines for emergency at research purposes.
Raya man sigon ro permit nga nabo-oe it COVID-19 medicine nga Remdesivir agud nga mapatigayon ro clinical trial sa Pilipinas.
Ginatantiya nga kapin sa P500,000 hasta P5 milyon pesos ro multa sa sin-u mang mapamatud-an nga nag-eabag ag naggamit it vaccine nga bukon pa it awtorisado it FDA.
