KALIBO, Aklan—Iligal ag may eamod pamolitika ro ginaduso nga pag-amyenda sa pilang porsyon it ordinansa nga nagatao it otoridad kay Mayor Emerson Lachica partikular ro pagbakae it eugta nga pagapatindugan it 3-storey nga multi-purpose building nga paga-obrahon nga relocation site it mga vendors sa Kalibo Public Market.
Sa ginpatigayon nga special session it Sangguniang Bayan ko Miyerkules it hapon, lima ro nagboto it YES ag ap-at ro NO rason nga nagdaog ro oposisyon.
Apang suno kay mayor Lachica nga ro nasambit nga numero hay owa naka-abot sa required nga 2/3 votes.
Kaibahan sa nagboto it yes para sa amendment hay sanday liga ng mga barangay president Ronald Marte, SB members Ketchie Luces, Philip Kimpo, Mark Ace Bautista ag SK federation president Romelyn Flores samtang ro nagkontra hay sanday SB members Augusto Tolentino, Daisy Briones, Buen Joy Villanueva-French, ag Matt Aaron Guzman samtang nag-abstain si SB member Mark Vega.
Gusto sigon it mga naga-oponer sa proyekto nga ibutang ro tanan nga pondo sa pagtukod it modernong 5-storey building nga Kalibo public market.
Mag-eowas kara, bukon man it pabor ro alkalde nga itaeana nga relocation site ro kahabaon it Toting Reyes St. bangud nga ginatantiya nga masobra sa daywang dag-on pa antes nga matapos ro construction nga makatuga it sab-eag bukon eamang sa mga vendors kundi sa mga motorista ag mga pumueuyu sa nasambit nga lugar.
Nasayuran nga kapin sa 700 nga mga stall holders ro iga-relocate sa oras nga maumpisahan ro proyekto.
Gusto ni mayor Lachica nga kon namahaean sanda sa presyo it eugta sa Judge Martelino St. sa Brgy. Andagao, Kalibo hay mausoy it ibang lote nga pagabak-eon.
Gintawag man kara nga bogus ro ginpatigayon nga public hearing bangud nga owa man sigon nakaangkon it interaction.
Sa ginpatigayon nanda nga survey, haeos 80% man sigon it mga vendors hay pabor sa relocation site.
Madumduman nga kaibahan ro proyekto sa pagagastusan sa ginsudlan nga loan it LGU Kalibo sa Development Bank of the Philippines.
