KALIBO, Aklan—Padayun nga nagatuga it mabahoe nga problema sa mga pumueoyo it Espanya ro pag-eapnaag it illegal squatting.
Suno kay Bombo International Correspondent Maria Edzel Lamparero Lopez nga kaeabanan sa mga baeay ukon apartment nga owa it tawo sa Espanya hay iligal nga gina-istaran it mga squatter.
Raya hay bangud kaabuan sa mga Espanyol hay naga-adto sa ibang parte it Europe para magbakasyon eabi eon kung tyempo it tag-init.
Dapat sigon nga insigidang makipag-angot sa mga kapulisan sa sueod it 48 oras matapos matueopagdan nga may iligal nga nag-istar sa baeay para sanda hay mapahalin.
Engkaso nga mapas-eawan, indi sigon pwede nga i-harrass ro mga raya sa baylo hay pagahueaton pa ro magiging desisyon it korte.//Nasayuran nga naga-abot sa masobra 3 million nga baeay ukon apartment ro owa it tawo sa Espanya.
Sa pihak nga parte, sangka 50 anyos nga persona ro nadakpan ag presenteng una sa paghinakop eon it mga otoridad matapos ro ginhimo nga pagpang-sunog sa nabukid nga porsyon it Zamora.
Suno kay Lopez, gin-aku mismo it suspek nga imaw ro responsable sa 18 ka mga insidente it sunog sa lugar.
Posible sigon nga may deperensya sa kaugalingon ro suspek bangud base sa imbestigasyon gusto eamang kara nga magpang sunog nga owa it rason.
Sa mayad nga swerte owa it nahalitan sa nasambit nga insidente.
