KALIBO, Aklan—Maid-id nga imbestigasyon ro ginapatigayon makaron it kapulisan angot sa natabu nga motornapping bandang ala-1:47 kaina it aga-aga sa Legaspi St. Poblacion, Lezo.
Ro motorsiklo hay sangka XRM 125, kulay itom ag may plate no. 8463 TF nga naka park sa nasambit nga lugar.
Ginasugid nga gin park anay ni Ervin Dalmacio it Brgy. Mina, Lezo ro anang ginhueam nga motorsiklo sa kilid it karsada matapos nga may gintambungan nga event may kaangtanan sa andang Bayangan Festival.
Apang sa anang pagbalik hay owa eon ro anang saeakyan rason nga insigidang nag report sa Lezo PNP station.
Angot kara, nagapati si P/Staff Sgt. Melanie Ibadlit it Lezo Municipal Police Station nga hungod nga gintakaw ro nasambit nga motorsiklo base sa nabo-oe nga CCTV footage ag bukon it simpleng na-tripan eamang.
Raya sigon ro unang kahigayunan nga may natabu nga kapareho kara nga insidente it motornapping.
Madali nga nayabehan ro motorsiklo bangud nga old model raya it XRM ag gin-modify eamang rason nga matsa bag-o.
Sa pihak nga parte, natigayon nga ma-intercept ro gintakaw nga motorsiklo sa check-point it Kalibo PNP sa may Kalibo – Numancia bridge kaina man it aga-aga.
Apang, matapos nga gintiketan gin papanaw ro driver kun sa siin ulihi eon nadiskubre nga ro motor nga ginkumpiska hay tinakawan sa banwa it Lezo.
Magkabulig makaron ro kalibo pnp ag highway patrol group sa follow-up investigation sa ginakahimtangan it suspek.
Ro motorsiklo hay presenteng sa impounding area it Kalibo PNP.
