KALIBO, Aklan—Mabahoe nga hangkat sa linyada it pulisya pag-abot sa imbestigasyon ro kaso it ginbaril-patay nga negosyante nga si Ryan Relator.
Raya ro gin-ako ni PLt.Col. Ricky Bontogon, hepe it Kalibo Municipal Police Station sa sangka press conference.
Suno kana, maid-id ro andang ginahimo nga inbestigasyon ag nagapabilin nga una raya sa proseso.
Maabo sigon ro andang ginatan-aw nga anggulo sa likod it krimen ag may naistorya eon man nga witness apang ko ulihi hay nag-atras.
Ginbulgar man ni PLt.Col. Bontogon nga may reward nga nakapatong sa ueo it mga suspek kon sa siin ginapasaeamatan nanda raya bangud nga mabahoe raya nga bulig sa nagapadayon nga imbestigasyon it kaso.
Ginpaathag dugang nga ro banwa it Kalibo hay punto it mga cctv camera apang bukon it tanan hay manami ro buoe ag ro iba sa mga raya hay uwa man nagafunction rason nga uwa sanda it mapag-on nga ebidensya kontra sa mga suspek.
Makonsidera man suno kana nga isolated case ro natabo bangud nga ro banwa it Kalibo hay nagapabilin nga matawhay ag mabahoe ro pagsalig it mga kapitalista bangud sa mga ginatukod nga negosyo.
