KALIBO, Aklan—Temporaryong ginsuspende it ginbilog nga investigating committee it Sangguniang Panlalawigan it Aklan ro ginapatigayun nga imbestigasyon angot sa ginpasaka nga kasong administratibo ni Madalag Vice Mayor Rex Gubatina kontra sa anang igkampod nga si Madalag Mayor Alfonso Gubatina.
Raya ro pagklaro ni SP member Soviet Russia Dela Cruz sa interview it Bombo Radyo Kalibo.
Suno sa opisyal, nakabaehag sa local government code nga dapat anay suspendihon ro anumang ginapatigayun nga imbestigasyon 90 diyas antes ro eleksyon.
Ro reklamo hay nauna eon nga gintugyan sa Committee on Laws, Rules and Ordinances kung siin ginrekomenda it komitiba nga kinahang-ean magbilog it investigating committee nga magabuyot sa kaso.
Raya sigon ro magahimo it imbestigasyon kaibahan ro mga ginplastar nga ebidenysa it tagreklamo.
Ginpahayag pa ni Dela Cruz nga nagpapanaog eon sanda it order nga naga-require kay Mayor Gubatina nga sabton ro reklamo kontra kana.
Madumduman nga ginpasakaan it bise alkalde it kasong administratibo partikular ro dishonesty and misconduct from the office si Mayor Gubatina.
Nasayuran nga maga-engkwentro sa pagka-alkalde it Madalag ro mag-igkampod sa 2022 national and local elections.
