KALIBO, Aklan— Gin-umpisahan eon it Department of Labor and Employment (DOLE) Region 6 ro andang imbestigasyon sa bulig it National Bureau of Investigation (NBI) sa ginasugid nga pameke it pilang employers ag empleyado sa Boracay it mga dokumento para makabueo it bulig pinansiyal halin sa Boracay Employment Program Adjustment Measures Program (BEEP-AMP).
Suno kay DOLE Regional Director Cyril Ticao, ro numero it BEEP-AMP aplications hay somobra sa gintaeanang pondo para sa programa kon siin prayoridad sigon nanda sa makaron ro mga trabahador nga na-profile ag na-verify antes ro pagpasarado it Isla.
Ro ahensiya sigon hay nagtaeana eamang it pondo para sa masobra 17,000 nga mga empleyadong na-profile apang nakabaton sanda it haeos 30,000 nga applications nga domoble sa numero it sakop sa andang fund allocation.
Dugang pa kara, inde eon sigon sanda magproseso it bag-ong aplikasyon it mga empleaydo para sa BEEP-AMP nga ro pangaean hay bukon it kaibahan sa profiled affected formal sector database.
Nasayuran nga may pilang mga empleyadong nagreklamo nga apektado it temporaryong pagpasarado it Isla bangud sa gin-hold sigon ro andang application agud inde makabaton it bulig pinansiyal sa idaeom it nasambitang programa.
