Gin-umpisahan eon ro imbestigasyon sa pilang serye it human trafficking scheme it sangka ‘Chinese mafia’ nga nagapangbiktima it mga Pilipino.
Sa pagpamati it Senate Committee on Women, Children, Family Relations, and Gender Equality, ginpresenta ni Senator Risa Hontiveros ro pilang mga biktima it ginasugid nga sindikato.
Ginbulgar it sambilog sa mga Pilipinong gina-alegar nga biktima it human trafficking sa Cambodia nga si alias “Ron” nga ro anang employer nga Chinese hay ginpilit imaw nga mag-recruit it ibang mga Pilipino para magtrabaho sa crypto scam operations.
Dugang pa kara nga ro andang head sa recruitment nga ginpangaeanan kay Rachel hay may una nga kontak sa Immigration officers sa Clark airport.
Gaabot sigon it suhol ro mga raya sa Immigration officer para makaguwa ro mga Pilipino.
Natatabo sigon ro recruitment sa pamaagi it online nga nagtueod man sa Senadora nga i-crack down ro social media platforms may kaangtanan sa trafficking schemes.
Ginpahayag pa it Senadora nga maabo eon ro napabalitang napahalin sa bureau of immigration apang padayon sa gihapon pagrecruit it mga Pilipino para mang-scam rason nga ginkuwestyon it mamalidha kung may una pang mga kontak ro sindikato sa sueod it bureau.
Nagtueod raya sa Senadora nga magpanawagan para sa madaeom nga imbestigasyon it mga opisyal it BI bangud sa posibilidad nga mas maabong koneksiyon it Chinese mafia sa suoed it ahensiya.
