Kalibo Aklan ———–Nagapadayun ro imbestigasyon it kapulisan sa natabu nga paeanakawan sa sangka pampublikong eskwelahan sa banwa it Kalibo.
Ginsueod ro classroom it Alternative Learning System (ALS) it Kalibo Pilot Elementary School ko aga-aga it Marso 23.
Base sa report it Kalibo Municipal Police Station, kaibahan sa mga gintakaw hay ro sangka unit it Flat Screen TV (14 inches), 1 set Speaker, Ring Lights, Tripod, V8 Microphone nga nagabalor it P10,000 pesos ag printer nga ginapanag-iyahan it LGU Kalibo nga nagahaega it P8,000 pesos.
Sa interview it Bombo Radyo, ginpahayag it security guard nga si Marcos Masangya nga naka-uli eon imaw kat gin-impormahan it anang karelyebo nga pwersahan nga ginsamad ro door knob it nasambit nga classroom ag ginpangbo-oe ro mga importanteng kagamitan .
Suno pa kana nga kada oras sanda nga naga-roving sa palibot it eskwelahan , apang owa eon nanda gina-agtunan ro nasambit nga area bangud nga protektado sigon raya it CCTV camera .
Ginasugid nga ro janitor it eskwelahan ro nakapan-o sa pagransak sa classroom nga insigida man nga ginpahisayod sa naka-duty nga lady guard nga imaw ro nagreport sa pulis kaibahan ro sangka manugturo.
Hasta sa makaron hay owa pa nakilaea ro suspek ukon mga suspek apang nagapadayun pa ro follow-up operation it Kalibo PNP agud nga sanda hay madakpan .
