NATIONAL News — Magapatigayon man it motu propio investigation ro Commission on Human Rights pinaagi sa andang regional office sa Region 9 ag pakikipag-angot sa Bangsamoro Human Rights Commission sa pagpatay sa sangka transgender student sa Tawi-Tawi.
Suno kay Mohammad Ghamidi Amilhassan, investigator on case it Bangsamoro-HRC, ginatun-an eon nanda ro kaso ag posibleng mataw-an it anumang klase it bulig it andang taeatapan.
Nagapati man ro LGBTIQ community sa nasambit nga lugar nga “hate crime” ro natabu sa biktimang si Khay Abdulgajir.
Ginpahayag ni Salm Kairo Dumanlag, Executive Director it Mindanao Pride, may “chilling effect” ro mga makarondaya nga klase it krimen nga natabu sa tunga it selebrasyon agud nga suk-ean ro diskriminasyon sa mga trans, bisexual ag LGBTIQ community.
Sa pihak kara, nagapati si Capt. Kuhutan Imlani Junior, Officer-In-Charge it Bongao Police Station nga hate crime ro motibo sa pagpatay.
Nasayuran nga brutal ro pagpatay sa biktima bangud sa mga nakitang laslas sa leog ag may mga igo it pagbuno sa nagkaeain-eain nga parte it eawas.
