Nagaeaum si Presiding Officer Francis “Chiz” Escudero nga matapos bago mag-Paskwa ro impeachment trial ni Vice President Sara Duterte agud nga indi eon raya pag-abuton it dag-on 2027.
Sa pihak kara, ginklaru ni Escudero nga owa pa it gintaeana nga deadline ukon siguradong iskedyul para sa pagtapos it pagbista.
Ginpahayag it senador nga hasta Nobyembre pa eamang ro ginpaguwa nga iskedyul it Senate Impeachment Court.
Suno kay Escudero, nakadepende ro kabuhay it pagbista sa kaabuon it ebidensya ag mga testigong iga-atubang it kampo ni Duterte.
Maskin nga sambilog pa eamang ro testigong gin-atubang sa hearing ko Lunes, ginaeauman nana nga magadasig ro proseso samtang nagapadayun ro presentasyon it depensa. Gintuead nana raya sa makinang diesel nga mahinay sa umpisa apang amat-amat nga nagadasig.
Angot man sa posibilidad nga limitahan ro numero it mga testigo, ginpahayag ni Escudero nga pwede eamang raya nga obrahon kun pauman-uman ukon owa it kaangtanan sa kaso ro mga ginpaguwa nga ebidensya. Dugang pa nga ginhimo eon man raya sa parte it prosekusyon.
Sa pihak it kawad-an it sigurado nga timeline, nagpahayag si Escudero it personal nga pag-eaum nga matapos ro pagbista bago ro Paskwa ukon Bag-ong Dag-on.
“Sa akin mismo, kung ako ang tatanungin mo, siyempre, in a perfect world sana matapos ang impeachment, sino man ang manalo o matalo, bago mag-Pasko, bago mag-New Year,” pahayag it senador.
Dugang pa ni Escudero nga mas mayad nga matapos eon ro pagbista agud nga maka-umpisa ro nasyon it panibag-ong chapter sa 2027 ag matutukan ro iba pang importanteng hangkat.
Nagpadayun ko Nobyembre 9 ro impeachment trial ni Duterte, kun sa siin, nag-umpisa eon nga mag-atubang it ebidensya ro anang defense team.
Sa makaron, nakasentro ro pagbista sa Article II it impeachment complaint nga may kaangtanan sa mga alegasyon it unexplained wealth ag bukon it tamang pagdeklara it mga propiyedad.
Owa pa it ginpaguwa nga pinal nga desisyon ro Senate Impeachment Court sa kaso.
