KALIBO, Aklan—Ginpahayag it Department of Education na naging maayos ro pagpadayun it implementasyon it limited face-to-face classes makaron nga adlaw, Disyembre 6 sa daywa pang pampublikong eskwelahan nga nadugang sa probinsiya it Aklan.
Sa monitoring it Bombo Radyo Kalibo, owa it anuman nga nailistang aberya sa daywang eskwelahan nga nagpasakop sa pagbalik it in-person learning.
Nauna eon nga ginpahayag ni Herline Teodosio, Principal II it Banga Elementary School sa Barangay Poblacion, Banga nga hugut nanda nga ginapatuman ro health protocols kun sa siin 12 eamang nga learners sa kindergarten ro ginapasugtan sa kada klase nga nagabuhay it ap-at nga oras ag 16 sa grade 1 hasta grade 3.
Magabueos-bueos ro daywang grupo kada domingo.
Mag-eowas kara, may bastante man sigon nga supply it face masks ag alcohol ro andang eskelahan.
Sa pihak nga parte, ginpaabot man ni Jocelyn Nillasca Principal III it Malinao School for Philippine Craftsmen sa Barangay Biga-a, Malinao nga makabig nga naging madinaeag-on ro andang pagpatigayon it klase.
Masobra sa 20 eamang nga mga estudyante ro andang ginpasugtan kada grade 11 ag grade 12.
Mag-eowas sa face to face nga klase hay magapadayun sanda sa andang modular distance learning.
Ro daywang nasambit nga eskwelahan hay kaibahan sa 177 nga gindugang nga pampublikong eskwelahan nga magpatigayon it klase umpisa makaron nga adlaw.
